’n Elektroniese vervaardigingsproses, naamlik platkabelsamestelling, word aangepas vir
uitvoering deur intellektueel gestremde persone. Vir toeganklikheid deur hierdie groep,
word menslike foute beheer deur die Poka-yoke-benadering. Die ontwerp van die
werkproses maak gebruik van standaard nywerheidgereedskap. Die ontwerp fokus daarop
om die moontlikheid van foute te identifiseer en kenmerke, meganismes, en toetsapparaat
te inkorporeer om die voorkoms daarvan onmoontlik te maak. Toetsresultate word ontleed
met leerteorie. Die slotsom is dat intellektueel gestremde persone bemagtig kan word, met
die Poka-yoke-benadering, om hierdie taak uit te voer binne normale variasie vergeleke
met die minimum taaktyd. Keuring is wel wenslik.